Kamis, 24 Januari 2013

Khotbah Minggu, 27 Januari 2013


Jamita tanggal 27 Januari 2013
EP: Nehemia 8: 1-10;            EV: Lukas 4: 14 – 21;           Patik: 4
Marhagogoon do Namanjaha dohot Tumangihon Barita Nauli
1.      Adong do hubungan ni Jamita sadarion tu Epistel ta saonari natarsurat di Nehemia 8: 1-11,  di epistel naung tabege nangkin tangkas do ala marluhut sandok bangso i gabe dipatorong si Esra ma hata ni Debata natarsurat dibuku patik i. Buku patik i disada gulungan do disurat ima harotas nanidokna papyrius. Dibahal partuaehan do si Esra manjahaon buku patik i di halak Israel. Songoni ma nang ditingki ni Jesus, uju Ibana bogot tu Nasaret huta hagodanganna dibagas joro i.
2.      Sada hasomalan do di halak Jahudi ujui patupa pangajarion di bagas joro (digoari ma Sinagoge), laos ido dipaihutihut huria naparjolo ditingki ni Apostel Paulus. Ia bentuk ni pangajarion taringot tu patik/ hata ni Tuhan i ima: manjaha, patoranghon/ menafsirkan sesuai tu keadaan namasa dingolu ni nasida.
3.      Dungkon dijalo Jesus pandidion nasian si Johanes pandidi di batang aek Jordan i Jala mijur ma Tondi Parbadia tu atasna marrupa songon darapati, jala masa ma soara sian ginjang, songon on: Ho do Anakku, haholongan i; lomo do rohangku di Ho. Marhite hagogoon ni Tondi Parbadia ima Jesus laho tu halongonan laos disi Ibana marpuaso lelengna 40 ari 40 borngin ndang mangan dohot minum. Dinapuaso i Jesus diunjuni sibolis i do Ibana, dung dipaujung sibolis pangunjunan na tu Jesus i laho ma ibana manadingkon Jesus. Gabe monang ma Jesus dipangunjnan naro tu Ibana i. Dungi dibogoti Jesus ma huta Galilea jala mandohoti paribadaton di joro i (Sinagoge). Dinasaret di bagas joro i Jesus rap dohot angka hahaangina ro marsiajar/ manjalo parsiajaran di patik/ hata ni Debata di ari Sabbat i.  Ro do halak Jahudi mangidohon tu Jesus asa dijahaon buku ni patik i, laos dilehon ma tu Ibana pustaha ni panurirang si Jesaya diungkapma i gabe dapot ni matana ma natarsurat songon on:
"Songgop do tu ahu Tondi ni Tuhan i, ai dimiahi do ahu, mamboan barita na uli tu angka na pogos. Disuru do ahu, mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i”. (ayat 18-19)
4.      Dung sun Jesus manjaha pustaha i dipatorang Ibana ma marhite tafsiran/ pemahaman naimbaru taringot tu surat i namandok: Jala dihatahon ma tu nasida: Sadari on do jumpang na tarsurat ondeng, di na binegemuna i. Boi dohonon paboa dipatorang jala dipaandar Jesus do tu natorop i paboa Ibana do tutu Mesias na ro naung sinuriranghon ni angka panurirang di padan narobi. Tangkas do didok di ayat 18-19 i paboa disuru Debata do Mesias Anakna i mamboan barita na uli tu angka na pogos. mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i. Ia siulaonon ni Jesus di hasiangan on. Molo di Markus 10: 45 didok: Ai nang Anak ni jolma i pe, ndada asa dioloi halak Ibana, umbahen na ro; Ibana do balik pangoloi jala mangalehon hosana bahen tobus ni torop jolma
5.      Ia angka na pogos. na tarhurung, na mapitung, angka na ginosagosa, nandiokna dison ima angka halak nagale, naso margogo, namangadopi angka kekerasan, ketidak adilan sian angka penguasa, raja napatupa penindasan dohot ketidak adilan ditonga-tonga ni masyarakat. Diharoro ni Jesus sipalua i disima adong kemerdekaan di angka jolma i. Alai didok Jesus dipangajarionna Unang ma dirimpu rohamuna: Ahu ro mangarumpakkon patik i, manang hata ni angka panurirang i pe. Ndang ro Ahu mangarumpakkon; na pajongjongkon do Ahu. Lapatanna paboa adong do hubungan ni patik ni Debata naginuruhon ni halak Jahudi i dohot tu sangkap haluaon ni Debata. Asa ido umbaen didok Jesus ia rimpunan patik na 10 i ima holong; holong tu Debata dohot tu dongan jolma. Sasude do manohoi Ibana jala longang be do, umbege hata na tabo na hinatahonna, gabe ninna ma: Nda anak ni si Josep Ibana? Dung sun Jesus patoranghon barita i gabe dipabali natorop i ma Jesus sian punguan i. 
6.      Jesus naro tu portibion patupa haluaon dohot angka pelayanan do ima hataridaan paboa Ibana ma Anak Haholongan ni Debata dohot naung ginohan ni Tondi Parbadia. Asa tung saluhut halak napinaluana i sonang jala marlas ni roha. Paboa Jesus i Anak Haholongan ni Debata dipargogoi do Ibana marhite Tondi Parbadia laho patolhashon angka barita nauli tu hita manisia na diportibion. Hataridaan namargogo Tondi Parbadia dihadirion ni Jesus ima wibawana napatolhashon hata i tu natorop i. Asa pola do targoar Jesus parjamita ulung naberwibawa. Alai ndang tarjangkon jolma i Ibana gabe ditulak bahkan pola mate tarsilang ala panulakon ni jolma i di Jesus poa dituhas angka naso situhason tu Ibana.
7.      Hita naung porsea di Jesus dohot napinaluana sian dosa dohot hamatean, naeng tangkas hita mamboto jala mangantusi di angka baritana. Olo tumangihon suara Tuhan i marhite na ringgas mangguruhn dohot manjaha hata ni Debata, ai sian i do gabe dapot dihita hagogoon dohot wibawa dinamangula hita disaluhut parngoluonta nang pelayananta di huriaNa i. jala sian natadatdati manjaha dohot mangguruhon hatana i disi do jumpang/ dapot di hita haporseaon namarsihohot di Tuhan i.
8.      Salah satu cara namangguruhon hata ni Debata olo tu mangihon jamita napinasahat ni angka parhalado di Huria i.  Alai aha ma naboi idaonta dipartingkian saonari, nunggagodangan hita naso olo be tumangihon jamita di huria i, gabe hasomalan sambing nama tabaen namarhuria i, nungga olo hita mandok ndang tabo jamita ni amanta sintua adui, tumabo do jamita ni amanta on. Jala masa muse dope sian hita hata namandok tung on ma manjamita i au, au pe nungga leleng parhalado/ sintua di huria on apalagi namarjamita i sintua na learning/ sintua nabaru tartabal. Hape molo masa hata nasisongoni namanulak hagogoon ni Tondi Parbadia i do hita di ngolunta on, dohot naso rade hita diajari Tuhan i.
9.      Porlu taboto disi adong parjamitaon disi do Tuhan i mian di hita marhite Tondina, jala dibagasan ni i jumpa ma di hita angka silas ni roha ai nungga dipatubegehon di hita barita haluaon i. Alani i ma naeng hita mangalehon roha nang pikkiranta tumangihon hata i dohot naeng hita mangguruhon marhite mandatdati manjaha i buku nabadia. Ai gunup halak namandatdati manjahai buku i di ibana do dapot hagogoon nasian Tuhan i. Amen.    

Tidak ada komentar:

Posting Komentar